Unidade de Rehabilitación Cardíaca, Respiratoria e de Medicina do Deporte
A Unidade de Rehabilitación Cardíaca, Respiratoria e de Medicina do Deporte do Hospital HM Modelo da Coruña conta cun equipo multidisciplinar de especialistas cuxo principal obxectivo é mellorar a calidade de vida do paciente, mediante un enfoque totalmente individualizado e adaptado ás necesidades específicas de cada caso.
Esta unidade especializada está dirixida a pacientes con enfermidade pulmonar crónica, enfermidade cardíaca ou que foron intervidos cirurxicamente do corazón. Así mesmo, tamén está orientada a aquelas persoas que practican ou desexan comezar unha actividade física ou deportiva, xa sexa de forma moderada ou intensa, e que buscan facelo coas máximas garantías de seguridade, someténdose para iso a recoñecementos médicos específicos.
Rehabilitación Cardíaca
Destinado ao paciente que ten unha enfermidade cardíaca ou foi operado de corazón, comprende sesións multidisciplinares dedicadas tanto ao adestramento físico como á educación do paciente, co obxectivo de controlar os factores de risco cardiovascular (tabaquismo, hipertensión arterial, colesterol elevado, sedentarismo…) a través de programas específicos. Constatouse que a mortalidade por enfermidade cardíaca diminúe entre un 20 e un 30 por cento se se leva a cabo esta clase de rehabilitación.
Rehabilitación Respiratoria
Os pacientes con enfermidade pulmonar crónica constitúen un grupo de poboación moi importante, que na actualidade non ten ben cuberta esta posibilidade de tratamento. Para iso, púxose en marcha o programa integral de rehabilitación respiratoria, que combina adestramento aeróbico con adestramento de forza muscular en extremidades, fisioterapia respiratoria, charlas educativas sobre a enfermidade e o seu tratamento e consellos sobre nutrición e hábitos de vida saudables.
Medicina do Deporte e Rehabilitación Cardio-Respiratoria
Esta unidade, integrada por un equipo de profesionais de Cardioloxía, Neumoloxía, Medicina Deportiva e Fisioterapia, ofrece unha atención de excelencia a persoas que realizan ou desexen realizar unha determinada actividade física ou deportiva, máis ou menos intensa, baseada nun exame integral previo e unha adecuación personalizada en función das súas particulares condicións e capacidade física.
Por outra banda, ofrece a pacientes con enfermidade cardíaca ou pulmonar unha atención especializada destinada a adquirir hábitos de exercicio saudables e a modificar outros nocivos, co obxectivo de obter o máximo das súas posibilidades físicas e mentais.